За Вилма Русковска, Обвинителството за гонење организиран криминал и корупција функционира одлично и има резултати. Но, признава дека има и притисоци.
Според нејзиното сведочење при дебатата на „А1он“, ѝ рекле:
„Внимавај што правиш, можеш да завршиш како Катица Јанева“. Очекува победа, а сигурна е 102,5 %. Во дебатата Русковска посочи: „Опозицијата не ме запишува, а позицијата ме отпиша“.
„Не се согласувам дека Обвинителството за гонење организиран криминал и корупција има мала доверба. Напротив“, додаде таа.
Одговори и дали барала одобрение пред да гони актуелни функционери од власта.
„Јас знаете што реков кога почнав да гонам актуелни функционери. Имаше една реченица во ‘Среќна Нова 49’, легендарна реченица, и секогаш ја споменувам:
‘Истокот нè отпиша, Западот не нè запишува’. Значи, мене опозицијата никогаш ме немала запишано, а позицијата ме отпиша“, рече Русковска, па одговори на тоа што значело нејзиното запишување кај власта, која сега ја отпишала.
Себеси се претстави како безгрешна. Не ги прифати забелешките од колегите, кои претендираат да ја добијат позицијата, дека пречесто била на телевизија и коментирала за дисциплинската постапка.
„Одлично си ја работам работата“, контрира Русковска.
Таа одговараше и дали ги штитела обвинителите што не работеле во ОЈО ГОКК. Зборуваше и за „тресењето од гаќи на судиите“.
На прашањето дали камшикот удри по нејзиниот грб, таа додаде: „Па не, ако мислите дали ми е загрозен угледот меѓу колегите, мислам не. Напротив, мислам дека сега имам поголема поддршка од колегите отколку што сум имала претходно“.
Обвинителката, ако не стане шефица, нема да се врати да биде основна обвинителка, открива во дебатата.
