Сојузот на синдикатите на Македонија(ССМ) како единствен репрезентативен синдикат и национален социјален партнер кој будно ги следи и анализира економските состојби во државата смета дека поради здравствената, енергетската и воената криза е потребно интензивирање на социјалниот дијалог во рамките на постоечките институции со цел отворен разговор и изнаоѓање на решенија за сите отворени прашања со цел ублажување на последиците од овие кризи особено за најранливите категории на работници и граѓани.
„Уште повеќе инсистираме и бараме на одпочнување на социјален дијалог бидејќи сметаме дека може да се соочиме со штетни последици за работниците како што се:
1. Губењето на реалната куповна моќ на работникот заради трошоците на живот – инфлација
2. Опасност од доцнење на неисплата од заработената плата.
3. Затварање на работни места и отпуштање
Со цел на преживување во време на кризата:
1. ССМ бара платите во државата да го следат порастот на инфлацијата, но и порастот на синдикалната кошница која ја изработува ССМ.
2. ССМ бара доследна примена на одредбите од колективните договори за усогласување на платите согласно порастот на инфлацијата како и утврдување на ваква одредба во општиот колективен договор за јавен сектор и општиот колективн договор за приватен сектор која ќе с еоднесува за сите работници и работодавачи
3. ССМ бара проширување на досегашни анти кризни мерки со замрзнување на маржата кај досега определените продукти како и проширување на повеќе прехрамбени продукти.
4. ССМ бара да се воведе повторно мерката за право на платежна картичка за купување домашни производи и плаќање на сметките за електричната енергија за одредена категорија на работници и граѓани кои се најзагрозени и најпогодени од економската криза односно бараме да се поделат вредносни картички за купување храна и плаќање на сметките за електрична енергија на одредена категорија на семејства, особено на оние чиј вкупен приход е во износ под просечна плата (31.812,00 денари) во едно четиричлено семејство во висина до разликата од синдикалната минимална кошница (48.230,00 денари). Исто така бараме да бидат опфатени и категориите на средношколци и студенти кои се школуваат надвор од местото на живеење со субвенционирање на дел од трошоците од нивното сместување. 5. ССМ бара да се овозможи бесплатен градски превоз до и од работа со оглед на тоа што таквиот трошок за вработените граѓани е секојдневен и неизбежен, а несомнено го оптеретува домашниот буџет. Овие мерки за работниците и граѓаните од најраниливе категории значат егзистенција во оваа економска и енергетска криза“, велат од ССМ.
Очекуваат Владата наредната недела на седница на Екомомско социјалниот совет да ги прифати ваквите мерки и на тој начин да им испадне во пресрет на работниците со најниски примања и најранливите категории на граѓани.