Под влијание на влажен и студен бран денеска ќе има значителна промена на времето со врнежи од дожд, кои наместа ќе бидат пообилни со над 25 литри на метар квадратен, велат од Управата за хидрометеоролошки работи.
„На планините врнежите ќе бидат од снег. Во текот на денот температурата значително ќе опадне и врнежите од дожд ќе преминат во снег и во пониските места.
На планините ќе се формира поголема, а во некои пониски места помала снежна покривка.
За време на викендот ќе дува засилен, повремено силен северен ветер, над 70 километри на час, а температурите ќе се задржат ниски до средината на следната седмица“, прогнозира УХМР.
Оттаму додаваат дека и во Скопје денеска времето ќе биде облачно и студено, претпладне со врнежи од дожд кои попладне и до крајот на денот ќе преминуваат во снег и се очекува да се формира помала снежна покривка, особено во повисоките делови од котлината.
Ќе дува засилен северен ветер кој ќе продолжи да дува и во недела претпладне. Температурата ќе опадне и ќе се задржи ниска до средината на следната седмица.
