На македонската политичка и правна сцена згасна животот на Панчо Минов, еден од најистакнатите политичари и правници, кој остави неизбришлива трага како дел од првиот парламентарен состав што ја донесе одлуката за независна Република Македонија.
Минов, кој својата кариера ја посвети на Кавадарци и Македонија, беше пратеник во четири мандати и градоначалник на Кавадарци во два мандати.
Во текот на својата долга и богата политичка кариера, тој се бореше за правда и демократија, учествувајќи во донесувањето на важни законски и државотворни решенија.
Јавноста ќе го памети како глас кој беше „стожер за обесправените, особено за земјоделците и обичниот човек“.
Како градоначалник на Кавадарци, тој инспирираше визија за развој базирана на идеалите на соживот, почит и солидарност, која ја надминуваше секојдневната политика. Опишан е како пример за јавен службеник со интегритет, знаење и човечност, вистински претставник на народот и „животен творец на историјата“
Зад себе, освен големото политичко наследство, го остави и своето семејство – беше сопруг, татко на две деца и дедо на два внуци. Неговата посветеност, како што се наведува, останува водилка за сите идни генерации.