Стабилните временски услови ќе продолжат и во текот на викендот, кога се очекува сончево и пријатно топло време преку ден, со утрински температури од 2 до 7 степени, а дневни до околу 20°C.
Меѓутоа, од понеделник попладне следува нова промена на времето. Над нашето подрачје ќе навлезе влажен и поладен воздушен бран од северозапад, кој ќе донесе врнежи од дожд и пад на температурите.
Според прогнозите, најпрво врнежи ќе има во западните предели, а потоа дожд ќе се прошири и во останатиот дел од земјата. Во вторник дожд ќе има во најголем дел од Македонија, а локално врнежите ќе бидат пообилни, особено во Пелагонија, Полошко и делови од Скопската котлина.
Ќе дува слаб до умерен ветер од северен правец, а со навлегувањето на студениот бран, дневните температури ќе се спуштат за 5 до 8 степени.