Македонската фолк пејачка Сузана Спасовска преку социјалните мрежи реагираше на лажни реклами кои кружат на интернет, а во кои се користи нејзиниот лик и име за промоција на наводни таблети.
Спасовска јавно ги предупреди граѓаните да не наседнуваат на ваквите измами, нагласувајќи дека нема никаква врска со рекламите кои се појавуваат на интернет и социјалните мрежи.
„Драги и почитувани фејсбук пријатели! Секојдневно ми пристигнуваат прашања за некои таблети кои се рекламираат преку реклами создадени од вештачка интелигенција, па сакам да ви кажам дека никого и ништо не рекламирам. Сите реклами кои ќе ги видите со мојот лик и моето име и презиме се лага! Не нарачувајте!“, порача Спасовска.
Пејачката апелираше до јавноста да биде внимателна со ваквите реклами, бидејќи станува збор за злоупотреба на нејзиниот идентитет и потенцијална интернет измама.
Во последниот период на социјалните мрежи и на одредени веб-страници сè почесто се појавуваат реклами генерирани со вештачка интелигенција, во кои се користат ликови на познати личности за промоција на различни производи без нивна дозвола.