Холивуд остана без уште едно препознатливо лице од осумдесеттите – актерот Доналд Гиб, кого публиката ширум светот го памети по улогата на Огер во култната франшиза „Одмазда на бубалиците“ („Revenge of the Nerds“), почина на 71-годишна возраст во својот дом во Тексас.
Веста за неговата смрт ја потврди неговиот син Тревис Гиб, наведувајќи дека актерот починал мирно, опкружен со семејството, по подолга борба со здравствени проблеми.
Семејството во емотивното соопштение истакна дека саканиот актер бил човек со длабока вера, посветен на семејството, пријателите и обожавателите кои го следеле низ неговата долгогодишна кариера. Тие побараа приватност и молитви во овие тешки моменти, порачувајќи дека засекогаш ќе остане запаметен како сакан татко, дедо и пријател.
Доналд Гиб во текот на осумдесеттите стана вистинска поп-културна икона благодарение на улогата на застрашувачкиот, но симпатичен Огер во филмот „Одмазда на бубалиците“ од 1984 година. Неговата висина, впечатливиот изглед и специфичната смисла за хумор го направија ликот еден од најпрепознатливите симболи на целата франшиза.
Популарноста на ликот беше толку голема што Гиб подоцна повторно го толкуваше Огер и во продолженијата „Revenge of the Nerds II: Nerds in Paradise“ и „Revenge of the Nerds IV: Nerds in Love“.
Сепак, неговата кариера не остана врзана само за една улога. Доналд Гиб со години важеше за едно од омилените „опасни лица“ во Холивуд, често толкувајќи силни и физички доминантни ликови. Публиката го памети и по улогата на Реј Џексон во акциониот хит „Крвав спорт“ („Bloodsport“) со Жан-Клод Ван Дам, како и по филмовите „U.S. Marshals“, „Hancock“, „Conan the Barbarian“ и бројни телевизиски серии.
Пред да започне актерска кариера, Гиб активно се занимавал со спорт. Студирал со спортска стипендија, играл кошарка и американски фудбал, а кратко време бил поврзан и со НФЛ тимот San Diego Chargers. По повреда здобиена во сообраќајна несреќа се откажал од спортот и се насочил кон глумата – одлука што му донесе култен статус во Холивуд.
Иако на екранот најчесто играше груби и опасни ликови, колегите и пријателите го опишуваа како исклучително топол, духовит и приземен човек. Токму затоа неговата смрт претставува голема загуба за генерациите гледачи кои пораснаа со комедиите и акционите филмови од осумдесеттите и деведесеттите години.