Со голема тага пријателите, колегите и познаниците се простуваат од Розетка Влаховиќ – Рози, жена која со својата благородност, посветеност и човечност остави длабока трага кај сите што ја познаваа.
Веста за нејзината смрт ја објавија од Унијата на жени на ВМРО – ДПМНЕ од Аеродром, од каде истакнаа дека Рози била жена со благородна душа, искрена насмевка и срце полно љубов за сите околу себе.
„Со голема тага се простуваме од нашата Рози. Жена со благородна душа, искрена насмевка и срце полно љубов за сите околу себе.“
„Мајка на многу деца, кои преку нејзината благородна работа и неизмерна грижа беа изведени на вистинскиот пат во животот“, објавија од Унијата на жени на ВМРО – ДПМНЕ од Аеродром.
Розетка Влаховиќ речиси 23 години била дел од Домот за деца без родители и родителска грижа, каде со својата работа, љубов и посветеност оставила неизбришлива трага.
Нејзините колеги ја опишуваат како искрен, директен и отворен човек, кој секогаш бил подготвен да помогне, да сослуша и да даде поддршка.
„Со својата добрина, сила и упорност беше пример што значи да се работи со срце“, порачаа нејзините колеги.
Бројни пријатели и познаници се простуваат од Рози со емотивни пораки и изрази на сочувство до семејството, роднините, соработниците и сите што ја познаваа и сакаа.
Нека почива во мир.
