Бугарското јавно обвинителство отвори истрага за предумислено убиство по смртта на 56-годишниот бизнисмен Владимир Јанков, чие тело беше пронајдено во изгорената семејна куќа во Банкија, во близина на Софија.
Од Обвинителството информираа дека случајот го води Софиското градско обвинителство, а истрагата е започната веднаш по извршениот увид на местото на трагедијата.
Телото на Јанков било откриено во понеделник околу четири часот изутрина, кога противпожарните екипи пристигнале на интервенција по дојава за пожар во неговиот дом.
Според досегашните сознанија, една од главните насоки на истрагата е дека пожарот бил намерно предизвикан по убиството, со цел да се уништат доказите и да се прикријат околностите под кои било извршено злосторството.
Истражните органи соопштија дека продолжуваат со собирање и анализа на материјални докази, како и со сослушување лица кои би можеле да помогнат во расветлувањето на случајот. И од противпожарната служба претходно посочија дека огнот најверојатно бил намерно подметнат.
Во меѓувреме, дел од бугарските медиуми објавија дека една од можните мотиви за убиството е наводна кражба на значителна сума средства од криптопаричникот на Јанков. Сепак, обвинителството засега не ја потврдува оваа информација и нагласува дека сите околности сè уште се предмет на истрага.
Според официјалните информации од бугарското обвинителство, Владимир Јанков е убиен на 27 јули 2026 година во неговиот дом во Банкија. Телото било пронајдено рано наутро, откако во 04:14 часот била примена пријава за пожар, а пожарникарите при интервенцијата го откриле неговото обгорено тело.