Легендарниот голман Петар Чех упати емотивна порака по повод 20 години од една од најтешките повреди во неговата кариера, кога во октомври 2006 година доживеа фрактура на черепот опасна по живот за време на натпреварот меѓу Челзи и Рединг.
Чех тогаш мораше итно да биде опериран, а во черепот му беа вградени две титаниумски плочки. И покрај сериозноста на повредата, чешкиот голман успеа да се врати на фудбалските терени по само 98 дена, што претставуваше неверојатно враќање по тешката животна битка.
По две децении, Чех повторно им се заблагодари на медицинските тимови и на болницата „Радклиф“ во Оксфорд, каде што му бил спасен животот.
„Уште еднаш им благодарам на медицинските тимови и на болницата „Радклиф“ во Оксфорд што ми дадоа шанса да живеам и ми овозможија да продолжам да го играм спортот што го сакав“, порача Чех.
Сепак, најемотивниот дел од неговото сведоштво се однесува на она што го смета за највредно по преживеаната несреќа. Чех откри дека најголемата радост за него е тоа што добил можност да стане татко.
Повредата од 2006 година засекогаш ја промени кариерата на еден од најдобрите голмани на својата генерација. По враќањето, Чех почна да носи заштитен шлем, кој стана негов препознатлив белег и го придружуваше во текот на остатокот од неговата кариера.
Неговата приказна и денес останува потсетник за тоа колку е тенка границата меѓу спортот и животната опасност, но и за силата, упорноста и благодарноста за втората шанса што ја добил.