На 64 години почина легендарниот Хуан Еткинс , човекот кој го крсти техно жанрот
Хуан Еткинс (Juan Atkins), еден од главните пионери на детроитското техно и човек со огромно, историско влијание врз светската електронска и танцувачка сцена, почина на 64-годишна возраст.
Неговата агенција „Гринсмит артистс“ (Greensmith Artists) ја потврди оваа тажна вест за музичкиот портал „Резидент адвајзор“ (Resident Advisor), наведувајќи дека Еткинс бил пронајден во бесознание во хотелска соба во Мексико Сити непосредно пред неговиот закажан настап, по што бил префрлен во болница каде што е констатирана смрт.
Творецот кој го крсти техно-жанрот
Еткинс создаде блескава, механичка форма на електронска музика – прво во рамките на дуото „Сајботрон“ (Cybotron), а потоа и под култниот псевдоним „Модел 500“ (Model 500) – која поседуваше моќ да владее со подиумите за играње, истовремено доловувајќи футуристички, научнофантастични светови. Тој беше првиот човек што го употреби изразот „техно“ за овој тврд електронски стил, со што го најави и го трасираше патот за целиот жанр кој денес е еден од главните столбови на светската клупска култура.
Роден во Детроит во 1962 година, Еткинс подоцна со семејството се преселил во руралното предградие Белвил во Мичиген.
„Едноставно не бев навикнат на тоа да одам во училиште со жолт автобус и да живеам покрај земјен пат“, изјави тој за „Гардијан“ во 2024 година.
Сепак, токму таму ги запознал Дерик Меј и Кевин Сандерсон, двајцата школски другари со кои ја формираше познатата „Белвилска тројка“ (The Belleville Three) – триото музички визионери што застана на чело на електронската авангарда.