Мостот на Западна Морава, кој го поврзува селото Мрчајевце со чачачките села Мршинци и Слатина, рано утрово е целосно уништен поради поројните дождови кои го погодија Чачак и неговата околина.
Моментот на уривањето на мостот го снимил Немања Богосављевиќ кој видел кога се скршиле столбовите и спречил поголема несреќа запирајќи го автобусот кој требало да помине преку мостот.
Во моментот на уривањето на мостот немало никој, а мостот веќе бил оштетен од поплави и сообраќајот преку него бил забранет.
Одлуката за прекин на сообраќајот на овој мост е донесена на 7 ноември 2022 година. Мештаните сепак го користеа тој мост бидејќи е најкратката врска меѓу двете села, а алтернативниот пат е долг 40 километри.
Немања Богосављевиќ утрово околу 6:20 излегол да види што се случува со нивото на Морава, дали ги поплавила нивите, а потоа отишол да види во каква состојба е мостот, бидејќи е оштетен.
„Синоќа во 22 часот мостот се држеше совршено, немаше поголеми проблеми. Утрово кога дојдов, во 6 часот и 20 минути видов дека столбот попуштил.
Во моментот повикав полиција, реков дека мостот ќе се урне затоа што се скршиле столбовите“, изјави Немања.
Како што истакна, кога се враќал кон Морава наишол на автобуси, неколку возила со турски работници кои работеле на Моравскиот коридор, кои сакале да го поминат мостот. Тој вели дека се обидувал да ги претекне и да ги спречи да го преминат мостот.
„Успеав некако да го блокирам преминот на автобусот на мостот. Во тој момент, по околу половина минута, дојде полиција и успеавме да спречиме голема катастрофа“, рече Немања, кој потоа се симна и снимаше во тој момент кога мостот се урнал.