Силно невреме проследено со пороен дожд, грмежи и засилен ветер попладнево го зафати Скопје.
При првиот налет на невремето паднаа и дрвја, од кои едно врз автомобил во движење, информираат од Центарот за управување со кризи.
– Едно од дрвјата во населба „Мичурин“ во Аеродром, падна врз автомобили и на еден во движење, среќа само на задниот дел на автомобилот во движење, појаснуваат од ЦУК.
Од УХМР велат дека низ државата и во вечерните часови ќе биде нестабилно со локален пороен дожд, грмежи и засилен ветер. На места процесите ќе бидат во форма на невреме со интензивен пороен дожд, силен ветер и појава на град.
– Во Скопје попладне ќе има развој на нестабилна облачност проследена со локален пороен дожд, грмежи и засилен ветер.
Во делови од котлината ќе има услови за краткотрајно невреме со интензивен пороен дожд, силен ветер и појава на град, се наведува на веб-страницата на УХМР
Дожд и невреме се очекува и утре.
– Времето ќе биде променливо облачно со сончеви периоди и нестабилно со локален пороен дожд, грмежи и засилен ветер. На места се можни поинтензивни процеси во форма на невреме со интензивен пороен дожд, силен ветер и појава на град.
Во Скопје, променливо облачно со сончеви периоди, повремено нестабилно со пороен дожд, грмежи и засилен ветер. Во делови од котлината ќе има услови за краткотрајно невреме, информираат од УХМР.
