На денешното ново судско рочиште за двојното убиство на Вања Ѓорчевска и Панче Жежовски, во скопскиот Кривичен суд прв сведочеше Ерол Османи, предложен од обвинителството.
Османи, кој го познавал Палевски речиси 25 години сведочеше за нивната комуникација и средби, вклучувајќи детали за возилото и неговите активности на деновите поврзани со случајот.
„Му помагав на Палчо во издавањето на весникот ‘Глобал’. Бев повикан од уредници да помогнам бидејќи не одеше како што треба. Имам познавања од мрежи и компјутери,“ изјави Османи.
На прашање од Обвинителството за средбата на 28 ноември минатата година, Османи објасни дека Палчо му се јавил претходниот ден и ја одложил посетата заради настинка.
„Ми рече дека е настинат и не можел да дојде на 27-ми“ рече Османи.
Според него, Палчо пристигнал кај него на 28-ми ноември со бело возило.
„Беше некое пикап бело, мислам француско возило. Забележав вдлабнатина на возачката врата,“ додаде тој.
На прашањето од јавниот обвинител дали Палчо некогаш доаѓал со оружје, Османи одговори: „Не.“
Османи истакна дека нивната комуникација обично се одвивала преку телефон или Фејсбук, месинџер, бидејќи Палчо често не одговарал на телефонските повици.
Во своето сведочење, Османи ги спомена и здравствените проблеми на Палчо, истакнувајќи дека знаел за неговите проблеми со кичмата.
„Знам дека имаше последните две години проблем со кичмата, но не ми спомена дека планира патување и лекување,“ рече Османи.
Во вкрстеното испрашување Османи потврди дека на 28-ми ноември имал комуникација со Палевски.
„Во 11:42 ми потврди дека ќе дојде. Ми рече дека е на подкаст во живо, ќе ја земе ќерка му од Алкалоид и потоа ќе дојде кај мене,“ објасни Османи.