Долгите шпекулации конечно добија потврда – Владата преку ребаланс на Буџетот за 2025 официјално објави ново покачување на пензиите и платите во јавниот сектор, пишува Банкометар.
Овој пат не се работи за симболични корекции – туку за конкретни, видливи суми кои ќе се почувствуваат уште со јулската исплата.
Според документите што ги објави Министерството за финансии, просечната пензија ќе скокне за 2.130 денари, што значи дека голем дел од пензионерите ќе примаат над 21.000 денари месечно. Ова покачување ќе ги опфати сите 330.000 пензионери во државата.
Но, ова не е сè. Јавната администрација – вклучувајќи ги вработените во МВР, здравството, образованието и општинските служби – ќе добијат меѓу 3.200 и 6.800 денари повеќе секој месец, во зависност од институцијата и рангот на работното место. Просечната плата во државните институции се очекува да достигне 45.000 до 50.000 денари, што е највисоко ниво досега.
Дополнително, минималната плата ќе се зголеми на 24.500 денари, што автоматски повлекува раст на целиот платен систем, вклучително и колективните договори. Родителите исто така ќе почувствуваат олеснување – се зголемуваат детските и образовните додатоци, како и социјалните трансфери за најранливите категории.
Владата објаснува дека зголемувањата се резултат на „добра наплата на даноци, стабилен раст и дисциплинирано трошење“. Критичарите, пак, тврдат дека зголемувањата доаѓаат „точно во изборна година“, и дека зад економските бројки стои политичка калкулација.
Извор: Банкометар