Тешка сообраќајна несреќа денеска попладне го потресе регионот меѓу Охрид и Кичево.
Околу 16:20 часот, кај селото Врбјани, се судрија „Фолксваген Голф“ и „Мерцедес“.
Епилогот е трагичен: една жена од Скопје почина на лице место, а пет други лица се повредени и пренесени во болницата во Охрид.
Според првичните информации, четворица од повредените биле во „Мерцедесот“, а едно лице од „Голфот“ – сите со сериозни повреди. Возилата се целосно уништени, а патот со часови беше блокиран додека траеше увидот на полицијата и јавниот обвинител.
Несреќата уште еднаш го отвори прашањето за безбедноста на патиштата во Македонија Делницата Охрид–Кичево одамна е позната по својата опасност – стара, недовршена и со минимална сигнализација. Непочитување на правилата, брзо возење и неисправна инфраструктура стануваат секојдневие со смртоносни последици.
Иако институциите реагираа брзо, останува горчливото прашање – до кога ќе броиме жртви наместо да ги спречуваме? Граѓаните бараат системски мерки, засилени контроли, но и ригорозни казни за дивеење по патиштата.