Цените на нафтата паднаа за повеќе од 3 проценти минатата недела
На светските пазари, цените на нафтата паднаа за повеќе од 3 проценти минатата недела, бидејќи трговците стравуваат од слабеење на побарувачката, додека од друга страна, Организацијата на земјите извознички на нафта (ОПЕК) го зголемува производството.
Цената на барел на лондонскиот пазар минатата недела падна за 3,8 проценти, на 65,50 долари, додека на американскиот пазар, цената на барел падна за 3,3 проценти, на 61,87 долари.
По две недели умерен раст, цените на „црното злато“ паднаа минатата недела, бидејќи трговците се загрижени за слабеењето на побарувачката за нафта, што го покажува силното зголемување на залихите во САД на крајот од сезоната на летни празници.
Дополнително, во петок беше објавено дека бројот на вработени во САД се зголемил за само 22.000 во август, значително помалку од очекуваните 75.000.
Пазарот на трудот во САД слабее со месеци, што значи дека потрошувачката исто така ќе ослабне. И поради ова, можеме да очекуваме забавување на растот на економијата, а со тоа и на побарувачката за нафта.
Дотолку повеќе што останатите најголеми економии во светот не се баш во најдобра форма.
„Тоа е еден вид совршена бура. Цените почнаа да паѓаат по најавата за можно зголемување на производството од страна на ОПЕК. А извештајот за работни места воопшто не му помогна на пазарот, бидејќи покажува дека пазарот на трудот слабее“, рече Фил Флин, аналитичар во Price Futures Group.
И покрај знаците за слабеење на побарувачката, ОПЕК и неговите картелски партнери веќе некое време го зголемуваат производството за да го зголемат пазарниот удел.