Холивуд и светот се простуваат од една од своите најголеми и најомилени ѕвезди. Легендарната, оскаровска актерка Дајан Китон почина во саботата, на 11 октомври, во својот дом во Лос Анџелес на 79-годишна возраст.
Во официјалното соопштение до магазинот „People“, нејзиното семејство ја откри причината за смртта и упати трогателна молба до нејзините обожаватели.
„Семејството Китон е бескрајно благодарно за извонредните пораки на љубов и поддршка. Нашата сакана Дајан почина од компликации од пневмонија“, се вели во соопштението.
Според извори блиски до семејството, нејзината здравствена состојба „многу нагло се влошила“ во последните неколку месеци, но таа одлучила својата битка да ја води приватно, далеку од очите на јавноста.
Во својот последен поздрав, семејството ја истакна нејзината огромна љубов кон животните и нејзината посветеност на хуманитарната работа. „Таа ги обожаваше своите животни и беше непоколеблив поддржувач на бездомниците. Затоа, секоја донација во нејзино сеќавање до локална банка за храна или засолниште за животни би била прекрасен и ценет омаж за неа“, порачаа тие.