Автобус со 21 патник од Бугарија, кој патувал кон Измир, Турција, целосно изгоре на влезот во земјата, на платото на граничниот премин Капикуле, при што за среќа нема повредени.
Возилото се запалило веднаш по пристигнувањето на граничниот премин, по што за кратко време било зафатено од силен пожар.
Возачот навреме ги забележал пламените јазици, веднаш го запрел автобусот и овозможил брза и безбедна евакуација на сите патници.
Очевидци сведочат дека автобусот за неколку минути се претворил во огнена топка, а густ чад се издигал над граничниот премин. На местото брзо интервенирале противпожарните екипи од Едрене (Одрин), кои го локализирале и изгаснале пожарот, но возилото било целосно уништено.
Надлежното обвинителство во Едрене отвори истрага за утврдување на причините за пожарот. Според првичните информации, се разгледуваат сите можни сценарија – од технички дефект до проблем со електричната инсталација или моторот. Конечните резултати ќе бидат познати по завршување на стручниот преглед и анализата на снимките од безбедносните камери на граничниот премин.