Американскиот претседател Доналд Трамп побара „безусловна капитулација“ на Иран, со што дополнително ја заостри реториката една недела по почетокот на војната што САД ја започнаа заедно со Израел.
„Нема да има договор со Иран освен БЕЗУСЛОВНА КАПИТУЛАЦИЈА“, напиша Трамп на социјалните мрежи.
Тој додаде дека по тоа би следувал избор на „голем и прифатлив лидер“ за Иран, по што САД и нивните сојузници би помогнале земјата да се опорави економски.
Неговата изјава доаѓа во момент кога се појавија првите сигнали за можни дипломатски посредувања. Иранскиот претседател Масуд Пезешкијан соопшти дека неколку држави започнале напори за медијација со цел да се стави крај на конфликтот, но не прецизираше кои земји се вклучени.
Во меѓувреме, борбите на теренот продолжуваат да се интензивираат. Израел изврши нови напади врз цели во Иран и Либан, додека Иран испрати ракети кон Израел и кон неколку држави од Персискиот Залив во кои се наоѓаат американски воени бази.