Двајца млади охриѓани се тешко повредени во сообраќајна несреќа што се случила во текот на ноќта во Охрид.
Според информациите од Министерството за внатрешни работи, несреќата била пријавена на 24 јули 2026 година околу 00:35 часот во СВР Охрид.
На улицата „Прва македонска ударна бригада“ во Охрид, 15-годишен малолетник од градот, управувајќи мопед со охридски регистарски ознаки, изгубил контрола над возилото и излетал од коловозот.
Во несреќата со тешки телесни повреди се здобиле малолетниот возач и неговата 17-годишна сопатничка, исто така од Охрид.
Повредите биле констатирани во Специјалната болница за ортопедија и трауматологија „Св. Еразмо“ во Охрид, каде што биле пренесени на лекарски преглед и понатамошно лекување.
На местото на несреќата увид извршила увидна екипа на СВР Охрид, по што ќе се утврдуваат сите околности под кои се случила сообраќајката.