Се појавија нови детали за трагедијата на Елбрус, во која загинаа петмина планинари од Босна и Херцеговина, иако овие информации сè уште не се официјално потврдени.
Руски специјализиран портал посветен на планинарството објави наводно сведоштво на еден од двајцата преживеани членови на експедицијата, Кемал Видимлиќ, кој раскажал како се одвивала трагедијата.
Според порталот, првите проблеми започнале на околу 5.500 метри надморска височина, кога на Алма Окановиќ ѝ се слошило. Таа, нејзиниот сопруг Денис и докторката Мелиха Чаушевиќ решиле да го прекинат искачувањето и да се вратат назад, додека останатите членови на групата продолжиле кон врвот.
Но, откако поминале само неколку десетици метри, планината ја зафатила силна снежна бура. По пат сретнале група планинари кои се симнувале и ги предупредиле дека повисоко речиси ништо не се гледа. Во тој момент, според рускиот портал, и Кемал Видимлиќ, Харис Адиловиќ, Нермин Талам и највозрасниот член на експедицијата, 63-годишниот Алмир Кривдиќ, решиле да се откажат од искачувањето и да се вратат назад.
Групата повторно се обединила, но состојбата на Алма Окановиќ нагло се влошувала. И покрај обидите да ја стоплат и да ѝ укажат помош, станало јасно дека без спасувачи нема да може да преживее. Харис Адиловиќ останал со Алма, нејзиниот сопруг и докторката Мелиха, додека Видимлиќ, Нермин Талам и Алмир Кривдиќ тргнале по помош.
Според наводите, тие не успеале да воспостават контакт со спасувачките служби. Пораките не можеле да се испратат, а телефонските повици не поминувале, па решиле што побрзо да стигнат до базата. Во меѓувреме временските услови дополнително се влошиле – почнал леден дожд, дувал силен ветер, а видливоста била речиси нула.
Според непотврдени информации, Алмир Кривдиќ почнал да ја губи силата. Неговите пријатели му давале електролити, витамини и стимуланси, но повеќе не можел самостојно да се движи. Со него останал Нермин Талам, додека Кемал Видимлиќ, по речиси три часа, успеал да стигне до руски планинари, кои го одвеле до спасувачите.
Во меѓувреме, Харис Адиловиќ останал со Алма, Денис и докторката, а потоа се спуштил до Талам и Кривдиќ.
„Починаа во неговите раце. Беше со нив пет часа. Кога сфати дека повеќе ништо не може да направи, тргна да си го спасува сопствениот живот“, наводно раскажал Видимлиќ, а пренесува рускиот портал.
Адиловиќ за време на спуштањето ја изгубил трасата по која претходно се движела групата, но на крајот бил пронајден и спасен од припадниците на спасувачката служба.
Напомена: Овие информации се темелат на наводно сведоштво објавено од руски специјализиран портал и во моментот не се официјално потврдени од надлежните институции.