Македонската православна црква – Охридска Архиепископија (МПЦ-ОА) и нејзините верници во првата недела од месец октомври (18-та недела по Педесетница) со голема чест, слава и молитва го одбележуваат Соборот на сите македонски Светители.
Иако секој светител од нашиот род си има свој посебен ден во црковниот календар, овој ден е одреден за заедничко сеќавање и длабока почит кон сите над 40 македонски светители кои во изминатите два милениума се подвизувале, пострадале и со своето мачеништво го зачувале христијанството на овие простори.
Духовни светилници и чувари на верата
Со своите богоугодни дела, македонските светители оставија неизбришлива трага не само за нашиот народ, туку и за целиот христијански свет. Извршувајќи подвизи достојни за восхит, тие се издигнаа кон божествениот живот, а нивните имиња денес блескаат како вечни венци на славата.
Меѓу нив, денеска со посебна љубов си спомнуваме за сесловенските браќа и просветители: Светите Кирил и Методиј како и за охридските чудотворци: Свети Климент Охридски, Свети Наум Охридски и Свети Еразмо Охридски. Ги спомнуваме и преподобните пустиножители Свети Гаврил Лесновски, Свети Прохор Пчински и Свети Јоаким Осоговски, потоа мачениците и новомачениците Свети Георгиј Кратовски, Света великомаченичка Злата Мегленска, Свети Агатангел Битолски, Свети Нектариј Битолски, Свети Анастас (Спасо Радовишки), Света Кирана Солунска и Свети Ангел Лерински.
На овој ден им оддаваме почит и на светите маченици и епископи светите 15 Тивериополски свештеномаченици, Свети Григориј Охридски, Свети Јован Кукузел, Свети Иларион Мегленски и многу други духови џинови кои со својата крв и молитва ги осветиле македонските простори.
Овој празник има посебно значење и за македонската дијаспора која што ја има низ целиот свет. Името „Собор на сите македонски Светители“ со гордост го носат соборната црква во Битола (која е меѓу најголемите светилишта), црквата во Тетово, како и македонските храмови во Лозана (Швајцарија) и Окленд (Нов Зеланд).
Денеска се слави и Светиот апостол Кодрат
Покрај овој голем собор, црквата денеска му оддава чест и на Светиот апостол Кодрат. Тој бил еден од Седумдесетте „мали апостоли“ кои по Христос го ширеле Евангелието низ светот.
Предодреден како мудар и исклучително образован човек, Свети Кодрат бил епископ во Атина и Магнезија.
За него житиописците забележале дека бил „како утринска ѕвезда сред облаци“ бидејќи со словото Божјо ја осветлувал темнината на незнабоштвото. Тој му напишал одбрана на христијанството (апологија) на царот Адријан, која толку многу го воодушевила паганскиот владетел што тој наредил христијаните повеќе да не се прогонуваат без докажана вина. Сепак, поради големата омраза на незнабошците кон Светиот апостол, Кодрат прво бил тепан со камења, а потоа фрлен во затвор каде што умрел од глад околу 130 година.
Обичаи и молитва за денешниот ден
Светиот апостол Кодрат се смета за заштитник на учените луѓе, студентите и сите кои бараат мудрост и одлучност во тешки моменти од животот.
Според црковната традиција, денеска верниците треба да посетат храм, да запалат свеќа за здравје на своето семејство, за спокој на душата и за мудрост во домот, упатувајќи ги следниве молитвени зборови:
Тропар за Свети Апостол Кодрат:
Светлината Христова преку тебе, о Апостоле Кодрате, го посрами мудрувањето елинско, но гордоста на тие што седат во смртна сенка удри по телото. Темнината незнаејќи дека словото е храна за верниот во Христа, сама ја раздра својата наметка, и затоа спасението по твоите молитви за нас е верно во Господа. Слава Тебе, Боже, за Твоето долготрпение.