Претседателот Стево Пендаровски, заедно со својата сопруга попладнево со комерцијален лет ќе лета во Лондон.
Пендаровски во Лондон ќе присуствува на погpебот на кралицата Елизабета Втора, која почина на 96 години.
Државниот погpеб на кралицата е закажан за утре во Вестминстерската палата.
Инаку, Пендаровски е еден од малкумината политичари кај нас кои користат комерцијални летови за патување.
Првото службено патување како претседател на државата, Пендаровски го започна со редовна авионска линија за Брисел.
На погpeбот на Кралицата ќе присуствуваат и лидерите на најголемите земји во светот.
Шефови на држави, политичари и претставници на монархиите од целиот свет пристигнуваат во Лондон за утрешниот погpеб на кралицата Елизабета Втора.
Меѓу нив е и американскиот претседател Џо Бајден кој доцна синоќа пристигна во Лондон.
Бајден е меѓу 500 шефови на држави и официјални лица кои што доаѓат во Лондон, што претставува собир на едно место на светски лидери, каков што не е виден со децении, јавува Би-Би-Си.
Премиерите на Канада, Австралија и Нов Зеланд веќе се во Велика Британија.
Покрај канадскиот премиер Џастин Трудо, австралискиот премиер Ентони Албанес и премиерката на Нов Зеланд Џасинда Ардерн, меѓу другите светски лидери кои ќе присуствуваат на погребот на Елизабета Втора се и францускиот претседател Емануел Макрон, ирскиот Таосеј Мишел Мартин, германскиот претседател Франк-Валтер Штајнмаер и италијанскиот претседател Серџо Матарела.
Присутни ќе бидат и членови на кралски семејства од цела Европа, јавува Би-Би-Си.
Сепак, како што пишува Би-Би-Си, во центарот на вниманието ќе биде официјалниот државен прием што ќе го приреди кралот Чарлс Трети во Бакингемската палата. За многу лидери тоа ќе биде единствената можност да се сретнат колективно.
