59-годишен македонски државјанин е уапсен во Пјаченца по убиството на сопругата, а потоа се обидел да изврши самоубиство во близина на гробиштата каде е погребан нивниот син, кој загинал во сообраќајна несреќа во 2020 година.
Тешка семејна трагедија ја потресе италијанската Пјаченца, откако 59-годишниот Хако Витанов, македонски државјанин, ја убил својата сопруга Милена Витанова во нивниот дом, а потоа се обидел да си го одземе животот.
Според италијанските медиуми, Витанов сам се јавил на итниот број 112 околу 15:30 часот и признал што направил.
„Дојдете, ја убив мојата сопруга“, рекол тој во телефонскиот повик до службите за итна помош.
Полицијата и итната медицинска помош веднаш пристигнале во станот на семејството, лоциран во населба во Пјаченца, каде што ја пронашле 56-годишната Милена без знаци на живот. Телото било пронајдено во дневната соба, со повреди на главата и нож во близина.
Според првичните информации, убиството било извршено со ладно оружје, а истражителите претпоставуваат дека на жената ѝ биле нанесени и повреди на рацете, најверојатно при обид да се одбрани.
По злосторството, осомничениот избегал и се упатил кон гробиштата каде е погребан нивниот 25-годишен син, кој загинал во сообраќајна несреќа во 2020 година – трагедија која, според блиски до семејството, никогаш не успеале да ја надминат.
Неколку часа подоцна, карабинерите го пронашле Витанов надвор од гробиштата со исеченици на рацете, што укажува на обид за самоубиство. Тој бил пренесен во болница и се наоѓа надвор од животна опасност.
Соседите го опишуваат семејството како добро интегрирано во локалната заедница, но според истрагата, брачниот пар подолго време имал семејни несогласувања и бил под силен психолошки товар по загубата на синот.
Двојката има четири деца, од кои едно е малолетно. Сите живееле заедно со родителите.
Италијанското обвинителство и карабинерите продолжуваат со истрагата за целосно расветлување на мотивите и околностите на ова трагично убиство.