Тешка сообраќајна несреќа ја потресе Австрија, откако товарен воз удрил во автомобил на железнички премин во Долна Австрија, при што загинале двајца државјани на Србија, а нивната двегодишна ќерка преживеала.
Трагедијата се случила во сабота попладне во областа Валдвиртел, во близина на местото Аленштајг. Според првичните информации, автомобилот во кој се наоѓало тричленото семејство бил удрен од товарен воз на железнички премин обезбеден со светлосна сигнализација.
Во несреќата животот го загубиле 39-годишен маж и неговата 34-годишна сопруга, додека нивната двегодишна ќерка успеала да ја преживее несреќата.
Австриските медиуми објавија дека зад воланот на автомобилот била мајката, која неодамна добила возачка дозвола. Истражителите ги испитуваат сите околности што довеле до несреќата, вклучително и можноста за невнимание, намалена прегледност или технички дефект на возилото.
Според некои сведоштва, постои можност автомобилот да останал заглавен на шините непосредно пред налетот на возот.
Ударот бил исклучително силен, а двајцата родители починале на самото место. Нивната ќерка била извлечена од задниот дел на возилото и со хеликоптер пренесена во болница.
Локалните власти соопштиле дека по нејзиното закрепнување за девојчето ќе се грижи нејзината баба.
Жителите на местото каде што живеело семејството со тага се простуваат од загинатите, опишувајќи ги како омилени и почитувани соседи. Спасувачките екипи со часови работеле на отстранување на уништениот автомобил од под композицијата.
Надлежните органи продолжуваат со истрагата за да ги утврдат точните причини за несреќата.