Голема семејна трагедија ја потресе Велика Британија откако сопругата и малолетната ќерка на британско-бангладешки политичар го загубија животот по несреќа на плажа во близина на Колчестер.
Колчестер се наоѓа во англиската област Есекс, а во несреќата го загубија животот Шелина Рахман (40), британска наставничка со потекло од Бангладеш, и нејзината 15-годишна ќерка Самеха Рахман.
Шелина беше сопруга на д-р Монсур Рахман, лидер на организацијата „Jubo Dal UK“, односно младинското крило на Националистичката партија на Бангладеш во Велика Британија.
Седумгодишно дете на апарати во болница
Трагедијата е уште поголема бидејќи уште еден член на семејството, седумгодишно дете, кое исто така било со нив, со тешки повреди е пренесено во болница во Лондон.
Таткото на починатата жена и дедо на тинејџерката, Муџибур Рахман, потврди дека седумгодишното дете во моментот се наоѓа на апарати за одржување во живот и дека лекарите се борат за неговиот спасување.
Несреќата се случила во средата вечерта за време на силна плима. Според изјавите на очевидци, повеќе членови на семејството влегле во водата кога одеднаш наишла силна плима.
Песокот под нивните нозе попуштил и се урнал, по што силната водена струја брзо ги повлекла кон длабоката вода.
Спасувачките екипи пристигнале на местото на настанот, но и покрај сите напори за реанимација, за Шелина и нејзината ќерка немало спас.
Плажата „Вест Мерси“ каде што се случила трагедијата нема постојана спасителска служба и покрај тоа што локалните власти и граѓаните често предупредуваат дека ова место е исклучително опасно за капење поради ненадејните промени на временските услови, силните подводни струи и брзиот пораст на нивото на морето за време на плима.