Двајца се здобиле со тешки телесни повреди во две одделни сообраќајни несреќи што се случиле во средата, 19 август, на скопските улици. Во двата случаи интервенирала полицијата, а повредените биле пренесени во здравствени установи.
Првата несреќа се случила околу 20:40 часот на крстосницата на булеварите „Гоце Делчев“ и „Киро Глигоров“. Според информациите од Министерството за внатрешни работи, во судирот учествувале патничко возило „џип“ со скопски регистарски ознаки, управувано од 38-годишниот Д.К. од Скопје, и велосипед управуван од 62-годишниот Н.Ј., исто така од Скопје.
Од ударот велосипедистот се здобил со тешки телесни повреди. Тој бил пренесен во ЈЗУ „Св. Наум Охридски“, каде што биле констатирани неговите повреди. Полициска екипа на СВР Скопје извршила увид на местото на несреќата.
Истиот ден, во друга сообраќајна несреќа во централното градско подрачје, тешко бил повреден и 39-годишен мотоциклист. Несреќата се случила на крстосницата меѓу улиците „Митрополит Теодосиј Гологанов“ и „Ленинова“.
Во судирот учествувале патничко возило „рено“, управувано од 39-годишен скопјанец, и мотоцикл „јамаха“, кој го управувал исто така 39-годишен жител на Скопје. Мотоциклистот се здобил со тешки телесни повреди и бил пренесен во Ургентниот центар при комплексот клиники „Мајка Тереза“, каде што биле констатирани повредите.