Излезеноста на денешните парламентарни избори во Србија веќе ја надмина конечната излезеност на изборите во 2023 година. До 17 часот гласале 60,9 отсто од избирачите, според процената на Центарот за слободни избори и демократија (ЦеСИД) и агенцијата Ипсос.
На парламентарните избори во декември 2023 година гласале 58,77 отсто од избирачите, според податоците на Републичката изборна комисија (РИК). Избирачките места денеска се затвораат во 20 часот.
За да се достигне рекордната излезеност од 24 септември 2000 година, кога изборниот пораз на Слободан Милошевиќ ги отвори патот за промените на 5 октомври, до затворањето на избирачките места треба да гласаат уште околу 700.000 граѓани.
На изборите за претседател и парламент на Сојузна Република Југославија во 2000 година гласале 4.916.920 од вкупно 6.871.595 регистрирани избирачи, односно 71,55 отсто. Речиси иста излезеност била забележана само на првите повеќепартиски избори во 1990 година.
Тогашниот кандидат на Демократската опозиција на Србија (ДОС), Воислав Коштуница, му се спротивстави на актуелниот претседател на СРЈ, Слободан Милошевиќ.
ЦеСИД уште во изборната ноќ, врз основа на паралелното пребројување на гласовите, објави дека Коштуница освоил 50,24 отсто, а Милошевиќ 37,15 отсто од гласовите. Тоа укажуваше на победа на опозицискиот кандидат во првиот круг.
Сојузната изборна комисија ги објави неофицијалните резултати дури два дена по изборите. Според нив, Коштуница освоил 48,96 отсто, а Милошевиќ 38,62 отсто од гласовите. Комисијата закажа втор круг за 8 октомври, но тој никогаш не се одржа.
Незадоволството кулминираше на 5 октомври, кога стотици илјади граѓани излегоа на улиците на Белград барајќи да се признае победата на Коштуница. По демонстрациите и упадот во државните институции, Милошевиќ на 6 октомври на РТС го призна поразот и најави повлекување од политиката.
На парламентарните избори во декември истата година излезеноста изнесуваше 57,64 отсто. Оттогаш, ниту едни парламентарни избори во Србија не се приближија до рекордот од септември 2000 година.
ЦеСИД и Ипсос и на денешните избори спроведуваат паралелно пребројување на гласовите на примерок од 750 избирачки места. Првите процени на резултатите се најавени меѓу 21:30 и 22 часот.
Излезеноста од утринските часови е значително повисока отколку на претходните избори. До 9 часот гласале 12 отсто од избирачите, повеќе од двојно во споредба со 5,2 отсто во истиот период во 2023 година.
Според РИК, до 16 часот гласале 56,38 отсто од избирачите. Долги редици се формирале пред избирачките места во Србија и во странство.