ПОПУЛАРНИОТ британски телевизиски водител и мајстор за градежништво, Томи Волш, почина во 69. година од животот по долготрајна и тешка борба со болеста.
Тажната вест за неговото заминување ја потврди неговата агентка Деби Шисер, која истакна дека водителот починал мирно, во кругот на своето најблиско семејство, кое апелираше јавноста и медиумите да ја почитуваат нивната приватност во овие тешки моменти.
Првичната вест за неговото заминување најпрво ја објави аматерскиот фудбалски клуб „Old Parmiterians FC“ од источен Лондон, за кој Волш со години наназад со голем ентузијазам бранеше како голман.
Од успешен градежник до телевизиска ѕвезда со 12 милиони гледачи
Томи Волш е роден на 18 декември 1956 година во Хачни, Лондон и неговата животна приказна инспирира многумина.
Пред да започне со својата успешна медиумска кариера, Томи со години успешно го водел сопствениот градежен бизнис. Неговиот влез во телевизискиот свет се случил сосема неочекувано – додека извршувал градежни работи на имотот на една позната ТВ-продуцентка, добил судбоносен повик за аудиција кој целосно му го променил животот.
Вистинска слава стекна како едно од заштитните лица на култната емисија на Би-Би-Си за уредување градини, „Ground Force“, која ја водел од 1997 до 2005 година во друштво на соработниците Алан Тичарш и Чарли Димок. Во оваа емисија тој беше главен за најтешките градежни зафати, изработката на дрвени тераси, ѕидови и водени површини, а на врвот од својата популарност емисијата привлекувала неверојатни 12 милиони гледачи.
Низ годините продолжи успешно да ја гради кариерата во бројни други телевизиски формати посветени на реновирањето и домот, меѓу кои се „Homes Under The Hammer“, „Clean It, Fix It“, „Challenge Tommy Walsh“ и „Flip That House“, а беше и автор на повеќе практични книги за самостојни поправки во домаќинството.
