Цените на нафтата утрово нагло пораснаа, откако новите тензии на Блискиот Исток повторно ги зголемија стравувањата од нарушено снабдување.
Brent нафтата поскапе за повеќе од три долари за барел и се искачи на околу 96 долари, додека американската WTI нафта се движеше над 93 долари за барел.
Пазарите реагираа по обновените израелски напади врз Либан, како и по извештаите за експлозии во Иран. Растот на цените ги избриша загубите од петокот, кога инвеститорите се надеваа дека може да дојде до смирување на конфликтот меѓу САД и Иран.
Според Reuters, Brent фјучерсите пораснале за 3,20 долари, односно 3,39 отсто, на 96,24 долари за барел, додека американската сурова нафта поскапела за 2,87 долари, или 3,17 отсто, на 93,41 долар за барел.
Дополнителна нервоза на пазарот создава состојбата околу Ормускиот Теснец. Секое ново заострување во регионот веднаш се чита како ризик за глобалното снабдување, особено во момент кога енергетските пазари веќе се под притисок од војната во Иран.
Иран во неделата испали ракети кон израелски цели, додека американскиот претседател Доналд Трамп продолжи да тврди дека договор за запирање на пошироката војна е можен. Според извештаите, Вашингтон го повикал Израел да се воздржи од нови напади, додека Техеран го поврзува мировниот процес со прекин на огнот во Либан.
Во исто време, OPEC+ се согласи на четврто зголемување на производните квоти во четири месеци. Но аналитичарите предупредуваат дека оваа одлука може да има ограничен ефект, бидејќи дел од членките не можат да ги исполнат своите производствени цели поради нарушувањата во снабдувањето, затворениот или ограничен проток низ Ормускиот Теснец и оштетувања на енергетската инфраструктура.
„На сегашниот пазар, физичкото влијание на таквата одлука би било близу до нула“, оценува Хорхе Леон од Rystad Energy.
Тоа значи дека, иако формално се најавува повеќе производство, пазарите повеќе гледаат кон геополитиката отколку кон бројките на OPEC+. Ако конфликтот продолжи да се шири или Ормускиот Теснец остане под притисок, цените на нафтата би можеле да останат високи и нестабилни.