Цените на нафтата продолжија да паѓаат во четврток, при што суровата нафта Брент се спушти под 71 долар за барел. Пазарите реагираат на знаците за постепена нормализација на испораките низ Ормутскиот теснец и очекувањата дека ќе продолжат разговорите меѓу САД и Иран.
На лондонскиот пазар барелот Брент попладнето се тргуваше по цена од 70,79 долари, што е за 78 центи помалку во однос на претходното затворање. Американската сурова нафта WTI поевтини за 90 центи и достигна 67,68 долари за барел.
Нормализирање на испораките
Оптимизмот на пазарите е поттикнат од постепеното враќање на поморскиот сообраќај низ Ормутскиот теснец, еден од најважните светски енергетски коридори.
Според Ројтерс, најмалку пет супертанкери на „Сауди Арамко“, кои превезуваат околу 10 милиони барели сурова нафта, веќе го напуштиле терминалот Рас Танура и пловат кон Оманскиот Залив. Уште четири танкери се наоѓаат во близина на терминалот, од кои три чекаат товарење.
Компанијата го обнови товарењето откако САД и Иран постигнаа рамка за нови разговори насочени кон ставање крај на конфликтот.