Во координирана акција спроведена во текот на изминатото деноноќие, полициски службеници привеле вкупно 23 лица во повеќе градови низ државата, откако кај нив или во нивните домови и возила била пронајдена различна видови наркотична дрога. Против сите осомничени ќе бидат поднесени соодветни пријави по целосното документирање на случаите.
Најголем број приведувања се реализирани во Скопје, каде што седум лица биле лишени од слобода поради поседување бела прашкаста, бела грутчеста материја и марихуана.
Во Тетово, при претрес извршен со судска наредба во домот на 41-годишен тетовец, била пронајдена марихуана, по што тој бил приведен и задржан во полициска станица.
Во Гостивар е приведен 54-годишен жител кај кого при личен преглед била пронајдена бела грутчеста материја.
Во Куманово биле уапсени две лица. При претрес во нивните домови полицијата пронашла бела прашкаста материја, црна тврда материја, таблети и марихуана.
Во Крива Паланка, по претрес во дом извршен со судска наредба, била пронајдена марихуана, а едно лице било лишено од слобода.
Полициска акција имало и во Радовиш, каде што прво бил приведен 42-годишен радовишанец кај кого биле пронајдени бела прашкаста материја и кокаин. Подоцна, на регионалниот пат меѓу селата Дедино и Конче, биле уапсени уште две лица од Скопје, откако при контрола на нивното возило бил пронајден хашиш.
Во Битола се приведени две лица кај кои полицијата пронашла бела прашкаста и грутчеста материја.
Во Ресен, при претрес во дом и помошни простории, биле откриени марихуана и дигитална вага со траги од дрогата, по што биле приведени две лица.
Во Прилеп е приведен 30-годишен жител, кај кого при претрес биле пронајдени марихуана, бела прашкаста материја и дигитална вага.
Во Кичево, пак, при сообраќајна контрола на патничко возило со струшки регистарски таблички, кај еден од патниците била пронајдена бела прашкаста материја, по што биле приведени три лица.
Од Министерството за внатрешни работи информираат дека по завршување на истрагите и целосното документирање на сите случаи, против осомничените ќе бидат поднесени соодветни кривични пријави.