Цените на нафтата денеска пораснаа за околу седум проценти, откако новата ескалација на конфликтот меѓу САД и Иран предизвика стравувања од нарушување на глобалното снабдување со енергенси.
Референтната нафта Брент достигна цена од околу 80 долари за барел, додека американската сурова нафта WTI се искачи на приближно 75,6 долари за барел.
Наглиот раст следуваше по изјавата на американскиот претседател Доналд Трамп дека примирјето со Иран е завршено. Тој најави можни нови воени напади и дополнителни мерки против Техеран, што дополнително ги вознемири светските енергетски пазари. Инвеститорите стравуваат дека евентуално проширување на конфликтот би можело да го загрози транспортот на нафта низ Ормутскиот Теснец – една од најважните светски поморски рути за извоз на сурова нафта.
Пазарите внимателно ги следат случувањата на Блискиот Исток, бидејќи секое нарушување на испораките од регионот може да предизвика нови поскапувања на енергенсите и дополнителен притисок врз глобалната економија.