Поранешниот премиер Никола Груевски преку објава на социјалните мрежи ги демантираше тврдењата дека становите кои беа запленети во предметот „Плацеви на Водно“ се негова сопственост.
Груевски тврди дека никогаш не бил сопственик на тие станови и дека целиот случај претставува, како што наведува, политички мотивиран судски процес инициран за време на владеењето на поранешниот премиер Зоран Заев.
Во својата објава тој посочува дека обвинителството, според него, не успеало да докаже дека платил средства за спорните станови, дека бил нивен сопственик или дека постои каква било финансиска или правна поврзаност со нив.
Груевски се осврнува и на судската постапка, наведувајќи дека бизнисменот Јордан Камчев првично негирал каква било негова поврзаност со предметот, но дека подоцна, според неговите тврдења, го променил исказот поради притисоци и уцени.
Поранешниот премиер тврди и дека во текот на процесот немало материјални докази што би ја потврдиле неговата поврзаност со становите, како што се договори, плаќања, сопственички документи или други докази.
Во објавата тој упати серија обвинувања кон поранешниот премиер Зоран Заев, оценувајќи дека целиот случај бил политички мотивиран. Груевски изнесува и тврдења за притисоци врз обвинети и судии за време на судскиот процес.
Предметот „Плацеви на Водно“ беше еден од најекспонираните судски случаи поврзани со поранешни високи функционери, а Груевски и претходно во повеќе наврати ги отфрлаше обвинувањата поврзани со овој случај.