Силно невреме со пороен дожд, интензивни грмежи, град и силни налети на ветер погоди голем дел од Грција, вклучително и поширокото подрачје на Атина.
Најобилни врнежи биле регистрирани во Тесалија, Евија, Атика и други делови од централна Грција, како и во Пелопонез, Епир и северните региони, особено на Халкидики. Националната опсерваторија во Атина регистрирала десетици илјади електрични празнења за време на бурата.
Покрив одлетал стотина метри
Најголеми материјални штети се пријавени во Макракоми во областа Фтиотида, каде што силниот ветер целосно откорнал покрив и го однел околу 100 метри подалеку.
Покривот при падот соборил столбови од електричната мрежа и оштетил паркирани возила. Бурата кршела дрвја, превртувала контејнери и носела необезбедени предмети низ улиците.
Во Ново Психико бил скршен електричен столб, кој паднал врз автомобили, додека во Пиреја се урнало скеле врз трамвајските шини. Во инцидентот немало повредени, но била причинета материјална штета.
Град ги побеле улиците
Силно невреме го зафатило и атинското предградие Илион, каде што возачите морале да запираат поради интензивниот град и намалената видливост.
Град ги погодил и Тирнавос и Еласона, каде што улиците и полињата за кратко време биле покриени со бел слој. На планината Олимп, пак, било регистрирано и летно провејување снег.
Стотици повици до итните служби
Од петокот попладне до раните утрински часови во саботата, грчките итни служби примиле околу 940 повици за отстранување паднати дрвја и предмети, испумпување вода и интервенции по оштетувања предизвикани од бурата.
Жителите на Лариса, Фтиотида, централна и северна Евија и островот Скирос добиле предупредувачки пораки преку бројот 112, со апел да ги ограничат движењата и да бидат внимателни поради опасните временски услови.