Инцидент со огнено оружје се случил рано утрово на локалниот пат што ги поврзува кумановската населба Карпош и селото Никуљане во Општина Старо Нагоричане.
Според информациите од Министерството за внатрешни работи, околу 2:40 часот од мопед во движење, на кој се превезувале две лица, биле испукани неколку куршуми кон патничко возило.
Станува збор за автомобил „ауди“ со кумановски регистарски ознаки, управуван од 34-годишниот Д.Д. од Куманово.
Иако биле испукани повеќе куршуми кон возилото, во инцидентот нема повредени лица.
По пријавувањето на случајот, екипа од СВР Куманово извршила увид на местото каде што се случил настанот. Полицијата презема мерки за утврдување на сите околности поврзани со пукањето, како и за идентификување и пронаоѓање на лицата кои се движеле со мопедот.
Надлежните продолжуваат со истрагата, а по целосното расчистување на случајот се очекуваат дополнителни информации за мотивот и околностите под кои дошло до пукањето.