Премиерот на РСМ, Димитар Ковачевски за утре попладне свикал итни седници на Извршниот и на Централниот одбор на СДСМ.
Состаноците на највисоките тела на партијата доаѓаат веднаш по одржувањето на лидерската средба, а по промената на ставот на ВМРО-ДПМНЕ и лидерот на ВМРО-ДПМНЕ, Христијан Мицкоски кои ги прифатија уставните измени за нивно учество во Влада за европска иднина.
Во вакви нови околности заседаваат органите на партијата а очекувано е темата да биде начинот и формата со којашто ќе продолжат разговорите со ВМРО-ДПМНЕ.
Вчера, Ковачевски оцени дека најголемата опозициска партија го променила ставот и сега не е против уставните измени.
Како што потврдија и тој и Мицкоски, на средбата тие размениле неколку предлози.
Премиерот првично излегол со предлог заеднички да се изгласаат уставните измени и потоа, веднаш по завршувањето на овој процес да се оди на избори. Меѓутоа, дал и дополнителен предлог за влез на ВМРО-ДПМНЕ во Владата.
Мицкоски, пак, одговорил дека е подготвен да учествува во заедничка влада со социјалдемократите, но барал во неа да не е ДУИ, а уставните измени да важат од моментот кога ќе почне ратификацијата на пристапниот договор за членство на земјава во ЕУ.
